FAQs Complain Problems

महत्वपूर्ण सुचना

बुलिङटार गाउँपालिका संक्षिप्त परिचय

नेपालका ७५३ स्थानिय तहका आ-आफ्नै विशेषता र परिचय रहेका छन । तिनै मध्ये अलग पहिचान र सम्भावना बोकेको स्थानिय तह हो बुलिङटार गाउँपालिका । नेपालको संविधान २०७२ले सुनिश्चित गरेको संघिय शासन प्रणालीलाई प्रभावकारी कार्यन्वयनमा लैजान तत्कालिन कोटथर, डाँडाझेरी, बुलिङटार, अर्खला, जौबारी (४-९ वडाहरु), भारतीपुर गाउँ विकास समिती मिलाएर बुलिङटार गाउँपालिकाको स्थापना गरिएको हो । ऐतिहासिक मन्दिर तथा प्रसिध्द ठाउँ बुलिङटार अर्थात समतल ठाउँमा रहेको र मगर जातिको भाषा अनुसार बुलिङ भन्नाले चार घर जनाउने र सुरुमा बुलिङ गाउँमा चार घर मात्र रहेको इतिहासको सम्मिश्रणबाट बुलिङटार गाउँपालिकाको नामाकरण गरिएको हो । गण्डकी प्रदेश अन्तर्गत नवलपरासी (बर्दघाट-सुस्ता पूर्व) जिल्लाको सदरमुकाम कावासोतीबाट ४४ किलोमिटर दुरिमा अवस्थित यस गाउँपालिका १४७.६८ वर्ग किलोमिटर क्षेत्रफलमा फैलिएको छ । विश्व मानचित्रमा २७.७५०४७८ देखि २७.८४८७४६ उत्तरी अक्षांश र ८४.०९६१११ देखि ८४.३०१८२ पूर्वी देशान्तरसम्म फैलिएको छ । यस गाउँपालिकाले नेपालको कुल भुभागको ०.०७८८ प्रतिशत र नवलपरासी (ब.सु.पू ) को १४.१५ प्रतिशत भूभाग ओगटेको छ । यसको पूर्वमा गैडाकोट नगरपालिका, पश्चिममा बौदिकाली गाउँपालिका, उत्तरमा रिसिङ गाउँपालिका र दक्षिणमा देवचुली नगरपालिका रहेको छ । कुल १९६५६ जनसंख्याको बसोबास रहेको यो गाउँपालिका नेपालकै एक सम्भावनायुक्त स्थानिय तहका रुपमा रहेको छ। घुमारीघाट, झेरिखण्डे दरबार, देबचुलि , बरचुलि ,  विभिन्न जातजातिका परम्परागत लोक नृत्य ( कौडा, चुट्का) जस्ता  ऐतिहासिक र सांस्कृतिक  सम्पदा होस वा आर्थिक पर्यटकिय क्षेत्र होस बुलिङटार गाउँपालिकाको सम्भावना अथाह छ ।  विगतमा एकात्मक शासन व्यवस्थाका कारण जन अपेक्षा अनुसार पुरा हुन नसकेका कामहरु निर्वाचित स्थानिय सरकारको अगुवाइमा धमाधम हुदैं छन । गाउँपालिकाले तय गरेको लक्ष्य कार्यान्वयन गराउनका लागि सबै जना लागि पर्नेहो भने अबको केहि वर्षमै बुलिङटार नेपाल कै नमुना गाउँपालिका बन्न सक्नेछ ।